سمو الشيخ خالد بن حمد آل خليفة
English
يابوي يا فخر العرب

يابوي يا فخر العرب والكون يا فخر السنين
العز أشوفه في عيونك أنت عزي وإسِعّدي

يوم المعارك حاصرتنا من يسار ومن يمين
وقفت أمامك وأحتزمت وقلت أمرك سيّدي

أقولها وآردد وشعبك معاي مردديين
إرقى يا بوسلمان لـ سهيل اليماني والجدي

عن معركتنا فاليمن يا سيدي أخذ اليقين
يوم أجتمعنا كلنا لـ الخاين ولـ المعتدي

أعدائنا في عيد الاضحى والشعوب معيدين
حنا ذبحناهم مثل ذبح الاضاحي والفدي

دون اليمن دون السعوديه بلاد المسلمين
حتى المواطن دونها للعسكريه يهتدي

في ظل قادات التحالف حازمين وعازمين
الشعب فيهم يعتزي والجيش منهم يبتدي

سلمان سلمان الحزم والعزم والراي الثمين
يا خادم البيتين حنا دون دارك نفتدي

وتعيش يا محمد يا ابوخالد يا نسل الطيبين
زايد ويفداه الكفو من قبل يفداه الردي

وأبوي قائدنا حمد له الولاء والحب دين
يكفيني إنه والدي وسيدي وقائدي

وأنا ولدكم وأفتخر فيكم ورب العالمين
إني لكم وأفداكم بروحي ودمي وإجسدي

كثر الحكي ماني بـ أحبه بس عندي كلمتين
وأنا لساني لا حكى يحكي بما تفعل يدي

وعدتكم آخذ بثار جنودنا المستشهدين
والجيش يدري فاليمن والله ما اخلفت إوعدي

 

خالد بن حمد بن عيسى آل خليفة

شاركـنـا !